* نەوژین
لە بەیانیەکی زوی ١٢ـی ئایاری ٥٢ ساڵ لەمەوبەر، رژێمی بەعس کچە خوێندکارێکی کوردی بەناوی (لەیلا قاسم) لەسێدارە دا، ئەم روداوە تەنها کۆتاییهێنان نەبو بە ژیانی کچە کوردێک، بەڵکو بو بە سەرەتای قۆناغێکی نوێ لە خەباتی سیاسی و مەدەنی ژنانی کورد، کە تێیدا سەلمێندرا ژنان دەتوانن لە بەرزترین ئاستی فیداکاریدا بن.
لەیلا قاسم، کە خوێندکاری بەشی کۆمەڵناسی بو لە زانکۆی بەغداد، تەنها وەک چالاکوانێکی سیاسی نەدەبینرا، بەڵکو وەک نمونەی ژنێکی رۆشنبیر و پێشەنگ دەردەکەوت، ئەو لە سەردەمێکدا خەباتی دەکرد کە بەشداریی ژنان لە کایە سیاسییەکاندا بەربەستی زۆری لەبەردەم بو، بەڵام توانی ئەو سنورانە ببەزێنێت.
هۆکاری دەستگیرکردن و تۆمەتە هەڵبەستراوەکان
لەیلا قاسم و چوار لە هاوڕێکانی (جەواد هەمەوەندی، نەریمان فوئاد مەستی، حەسەن حەمەڕەشید و ئازاد سلێمان میران) بەهۆی چالاکییە سیاسییەکانیان و ئەندامبونیان لە "یەکێتی قوتابیانی کوردستان" لە کۆتایی نیسانی ١٩٧٤ دەستگیرکران.
رژێمی بەعس بۆ شاردنەوەی رەهەندە سیاسییەکەی و پاساودانی سزای سێدارە، چەند تۆمەتێکی بۆ هەڵبەستن، وەک "پلاندانان بۆ تەقینەوە لە سینەماکانی بەغداد" و "تێکدانی ئاسایشی نیشتمانی".
دادگاییکردنێکی ساختە و خێرا
تەنها دوای دو هەفتە لە دەستگیرکردنیان و لەژێر ئەشکەنجەیەکی زۆردا، لە دادگایەکی نادادپەروەر و بەبێ بونی پارێزەر، سزای لەسێدارەدانیان بۆ دەرچو، ئامانجی سەرەکی رژێم لەم سزایە، ترساندنی خوێندکاران و گەنجانی کورد بو لە ناو جەرگەی بەغدا؛ بەڵام ئەوەی رۆژی دادگاییەکە بو بە بابەتی رۆژ ترس نا بەڵکو هەڵوێستی ئازایانەی لەیلا قاسم بو، کە روبەڕوی دادوەرەکە وەستایەوە و بەرگری لە کوردبونی خۆی کرد.
بوکی کوردستان؛ نازناوێک بۆ نەمری
کاتێک بەرەو پەتی سێدارە دەبرا، لەیلا قاسم بە جلی کوردییەوە و بە سرودی "ئەی رەقیب" پێشوازی لە مردن کرد، ئەم هەڵوێستەی وایکرد نازناوی "بوکی کوردستان"ـی پێببەخشرێت، ئەو پێش شەهیدبونی داوای لە دایکی کردبو کە بۆی نەگری و جلی کوردی نوێی بۆ بەرێت، چونکە ئەو رۆژە لای ئەو وەک رۆژی شایی و هاوسەرگیری وایە.
