خوشک و برایەک پێکەوە کارگەیەکی کەرەی عەلی بابا بەڕێوەدەبەن

2023/08/13    833 جار بینراوە

 

* نەوژین، بەنان فاروق

خوشک و برایەک لە سلێمانی کارگەیەکی دروستکردنی "کەرەی عەلی بابا"ـیان دامه‌زراندوه‌ و دەڵێن: له‌ به‌رنامه‌ماندایه‌ کارگەکە گەورەتر بکەین و هەلی کار بۆ چەندین کەس بڕەخسێنین.

خەندە و ژیار کەمال، خوشک و بران، بۆ یەکەمجار لە کوردستان و عێراق کارگەیەکی دروستکردنی "کەرەی عەلی بابا"ـیان لە شاری سلێمانی بەناوی هامنۆ (نوێگەری) کردوەتەوە.

لەبارەی کارگەکەوە خەندە بە نەوژینی وت: لەنێو کارگەکەمان سێ جۆر لە کەرە بە تامی (سادە، هەنگوین و شکوڵاتە) بەرهەم دەهێنین، پلانمان هەیە لە داهاتو دا جگە لە کەرە چبزی عەلی بابا و شیرینی عەلی بابایش دروستبکەین، هەروەک لەگەڵ گەورەبونی کارگەکە لەپڕۆژەماندایە چەند گەنجێک لێرە دابمەزرێنین تاوەکو سودمەند بن لێی.

وتیشی: بەرهەمەکانمان بەتەواوەتی خۆماڵین و دورن لە مەوادی حافیزە.

کارگەکە ماوەی چوار مانگە کەوتوەتە کار، دروستکردنەکەی بیرۆکەی ژیار بوە، ئەو ماوەی سێ ساڵ دوکانی چەرەساتی هەبوە بیرۆکەکەشی هەر لەوەوە وەرگرتوە.

ژیار، بە نەوژینی وت: بیرۆکەی دروستکردنی کارگەکەم لە دوکانی چەرەسەکەمەوە بۆ هات، ئەوکات سەیرم دەکرد لێرە بەرهەمی دەرەوە بەراورد بە بەرهەمی ناوخۆ زیاتر گرنگی پێدەدرێت و لەبەرامبەریش دا کوالێتی باش نیە و نرخیشی گرانە بۆیە بیرم لە دروستکردنی کارگەیەک لەم بوارە کردەوە، هەروەها هۆکارێکی دیکەش هەبونی سودە زۆرەکەی بو و وتم گرنگە کارێک بکەین سودی بۆ خەڵکی هەبێت.

لەبارەی ئەوەی چۆن خوشک و برایەک پێکەوە کارگەیەک بەڕێوەدەبەن، ژیار وتی: بڕیارمان دا پێکەوە کاربکەین، چونکە هەردوکمان لەدوای تەواوکردنی زانکۆوە بێکار مابوینەوە، خەندەی خوشکم زۆر خەمی منی بو و دەیویست کارێکم هەبێت، منیش حەزمکرد کارەکە پێکەوە بکەین، چونکە ئەم جۆرە کارانە پێویستی بە پاکی و وردی زۆر هەیە و ژنان لەو روەوە باشترن بەراورد بە پیاوان.

لەبارەی شێوازی کارکردنیشیانەوە، خەندە وتی: رۆژانە هەشت بۆ دە کاتژمێر کاردەکەین، بەرهەمەکانمان بەزۆری بەشێوەی ئۆنلاین ساغ دەکەینەوە، هەندێک کاتیش دابەشی سەر مارکێتەکانیان دەکەین.

خەندە، هاوکات خێزاندارە و دایکی چوار مناڵە، وتی: کارکردن و ئەرکی دایکایەتی کردنی چوار مناڵ قورسە، بەڵام توانیومە هاوسەنگی رابگرم و خێزانەکەشم یارمەتیدەرن لەو روەوە.

 

 



Newjin.net - 2024
ژمارەی سەردان 1,274,174     ژمارەی میوان 508

دروستکراوە لەلایەن کۆمپانیای (کۆدتێك)ەوە