‏”شێرپەنجە لە پێکەنینی نەخستم“‏

2021/02/07    667 جار بینراوە
 
* نەوژین
 
من سۆزیار عمر، لە ۱٥/۸/۱۹۹٥ لە شاری سلێمانی لەدایک بوم، خۆێندنم لە زانکۆی راپەڕین ‏بەشی زمانی ئینگلیزی تەواوکردوە، مامۆستام لە زانکۆی کۆمار دەرسی زمان ئەڵێمەوە، ماوەی ‏سێ ساڵە هاوسەرگیریم کردوە.‏
 
ساڵێک بەرلە ئێستا پاش دروستبونی گرێیەک لە مەمکم و عەمەلیاتکردنی دەرکەوت کە ‏شێرپەنجەی مەمکم هەیە، پاش دو عەمەلیات و چەندین جەلسەی کیمیایی و تیشک و چەندین ‏ناخۆشی وسەختی لە ماوەی ئەو ساڵەدا سوپاس بۆ خوا ئێستا باشم و چەن چارەسەرێکی ‏کەمم ماوە.‏
 
 
”ماڵەکەم نەکردە تەعزیەبار“
 
 
من بەهێز بوم، زانیم نەخۆشم سوپاسی خوامکرد، چونکە هەمو نەخۆشییەک لای ئەودێ و ‏چارەسەریش هەر لایخۆیەتی، ساڵێکی پر لە سەختی و ناخۆشی بو، بەڵام لە پێکەنینی ‏نەخستم‎ ‎ماڵەکەمم نەکردە تەعزییە و لە كارەکەم و ژیانی ئاسایی خۆم بەردەوام بوم، تەنانەت ‏بە باشترین مامۆستای ساڵ دیاری کرام. ‏
 
 
سۆزیار عمر، وەرگرتنی یەکەم دەرزی کیمیایی تایبەت بە شێرپەنجە
 
مەبەستم لە باسکردنی ئەم چیرۆکە ئەوەیە کە شێرپەنجە ئەو وەحشە نیە کە خەڵک لێی ‏ئەترسێ، راستە زۆر قورسە زۆر بە ئازارە زۆر ناخۆشە بەڵام تێ ئەپەڕێت، ئاگاداری خۆتان بن ‏هەمیشە پشکنینەکانتان لەکاتی خۆیا بکەن و نەخۆشیەکانتان ئیهمال مەکەن، خانمانی ئازیز ‏پشکنینی مەمک زۆر گرنگە، تکایە پشت گوێی مەخەن گرنگ نیە تەمەنت چەنە من تەنها ۲٤ ‏ساڵ بوم نەخۆش هەیە لە منیش گەنجترە، ئەو نەخۆشیە تا زوتر پێی بزانیت ئاسانتر ‏چارەسەر ئەکرێن.‏
 
 
سوپاسی دایکم و هاوسەرەکەم و هەمو هاوڕێ و ئەندامانی خێزانەکەم و هەمو کەسە نزیک و ‏دورەکان ئەکەم چونکە هەمیشە ئەوەی توانیبێتیان بە زیادەوە بۆیان کردوم‎ ‎سوپاسی ‏خوێندکارە ئازیزەکانم ئەکەم کە هەمیشە پاڵپشتیان کردوم خەمخۆرمبون، ڕێز و خۆشەویستیم ‏بۆ هەمو دکتۆر و کارمەندە ماندونەناسەکانی نەخۆشخانەی هیوا هەیە.‏
 
 
سۆزیار عمر، وتنەوەی وانەکانی بە شێوەی ئۆنلایەن بە خوێندکارەکانی 
 
”تابەهێرتربیت ئاسانتر تێدەپەڕیت“
 
کە پێیان وتی شێرپەنجەت هەیە کۆتایی دنیا نیە، وەک هەمو نەخۆشییەکی تر ئەچیتە ‏نەخۆشخانە و چارەسەر وەرەگری، راستە چارەسەرەکان زۆر سەختن من تا ئێستاش ئازارەکەی ‏لە جەستەما ماوە، بەڵام هەرگیز لەبیریمەکە تا بەهێز بیت ئاسانتر تێئەپەڕێت، خوای گەورە ‏شیفا دەنێرێت، بە هێز بن ئەوەی لەدەستی ئەدەن تەنها کاتیە و هەموی ئەگەڕێتەوە و ‏باوەڕتان بەخۆتان هەبێت، پشکنینەکانتان بیر نەچێت.‏
 

سۆزیار عمر، دوای وەرگرتنی چارەسەرەکان بۆ ئەم وێنەیەی دەڵێت "قژەکە هی خۆم نیە"

 

 

 



ئەرشیفی نەوژین | دەربارە | پەیوەندی
Newjin.net - 2021
دروستکراوە لەلایەن کۆمپانیای (کۆدتێك)ەوە
ژمارەی سەردان 314,419     ژمارەی میوان 23