* نەوژین
لیژنەی داکۆکیکردن لە مافی ئافرەتان لە پەرلەمانی کوردستان رایدەگەیەنێت: ”کوشتنی ژنان لە کوردستان روی لە هەڵکشانە لە پەرلەمانەوە یاسای نوێ بۆ بنبڕکردنی ئەم دیاردەیە دەردەکەین“.
لیژنەی داکۆکیکردن لەمافی ئافرەت لەپەرلەمانی کوردستان، راگەیاندراویکی بڵاوکردەوەو رایگەیاند: ”ئەم ماوەیە کوژرانی کچ و ژنانی کوردستان لەهەڵکشاندایەو ئامارەکانی ئەو پرسە جێی نیگەرانی و تێڕامانی قوڵن، ئێمە سەرکۆنەی کوشتنی ئافرەتان دەکەین لەژێر هەر پاساو بیانویەک بێت“.
لیژنەی داکۆکیکردن لەمافی ئافرەت لەپەرلەمانی کوردستان، دەشڵێت: ”وێڕای پاڵپشتیی لیژنەکەمان لەهەنگاوەکانی دەسەڵاتی جێبەجێکردن و دادوەری بۆ سەپاندنی سزای یاسایی توند بەسەر تاوانباران وئەنجامدەرانی ئەم تاوانانە، هەمو هەنگاوەکان چڕ دەکەینەوە بۆئەوەی یاسایەکی نوێ سەبارەت بە 'بەرەنگاربونەوەی توندوتیژیی خێزان و ئافرەت' لەم خولەی پەرلەمان دەربکرێت، تێیدا رێکارەکانی سزادانی تاوانبارانی کەیسەکانی کوشتنی ئافرەت زۆر توندتر بکرێن و ببنە بەربەست بۆ بنبڕکردن و کەمکردنەوەی ئەو دیاردە“.
لە کۆتایی بەیانامەکدا لیژنەکە ئاماژەی بەوەکردوە: لەهەمو ئەمجۆرە کەیسانە پێویستە حکومەت خاوەندارێتییان لێبکات، رێگه بەسوڵح و رێکكەوتنی عەشایەری نەدات، سزای توندی ئەوانە بدرێت کەتاوانی کوشتن ئەنجام دەدەن، لەپاڵ یاسادا پێویستە لایەنە پەیوەندیدارەکان بەئەرکی خۆیان هەڵبستن لەپەروەردەو رۆشبیری و ھۆشیارکردنەوەی کۆمەڵگه، تاوەکو عەقڵییەتە ژنکوژەکان بپوکێنەوەو بونیان لەکۆمەڵگەدا ببێتە مایەی شەرم و شەرمەزاری.