* نەوژین
وتەبێژی وەزارەتی ناوخۆی عێراق رایگەیاند: سزای ١٠ ساڵ زیندانی و دەرکردن لە کارەکەیان بۆ ئەفسەرێک و سێ کارمەند دەرچوە، بەهۆی دەستدرێژیکردنە سەر ژنە راگیراوێک.
عەقید محەمەد عەلی حەسون، لە راگەیەنراوێکدا دەڵێت: سزای ١٠ ساڵ زیندانیکردن و دەرکردن لە کارەکەیان بۆ ئەفسەرێک و سێ کارمەند دەرکرا، ئەمەش لەسەر کەیسی دەستدرێژیکردنە سەر ژنە دەستگیرکراوێک لەناو گرتنگەی یەکێک لە بنکەکانی پۆلیس لە پارێزگای دیوانییە.
رونیشیکردەوە: تەواوی رێکارە یاساییەکان دژی تێوەگلاوان گیراونەتەبەر و وەزارەتی ناوخۆ بەرامبەر هیچ جۆرە سەرپێچی و پێشێلکارییەک کەمتەرخەم نابێت.
سەرەتای ئەم مانگە هەواڵی دەستگیرکردنی ئەفسەرێک بە پلەی نەقیب و رێپێدراوێک و دو پۆلیس بڵاوبویەوە، پاش ئەوەی دەرکەوتوە دەستدرێژیی سێکسییان کردوەتە سەر ژنە راگیراوێکی تەمەن ٢٦ ساڵ، بەشێوەیەک چەند جارێک کامیرەکانی چاودێرییان کوژاندوەتەوە و ژنەکەیان هێناوەتە ژوری ئەفسەرەکە و دەستدرێژییان کردوەتەسەر.
