* نەوژین
"ئامادەیی زۆری ژنان لێرەدا نمایشی ئەوەیە کە ژنانی ئێمە خوێنەر و نوسەرن"؛ ئەمە وتەی کچە نوسەر ئیلهام دڵشاد ـە لە بارەی یەکەمین پێشانگای کتێبی کوردی لە هەولێر، کە لەژێر دروشمی "بە کوردی نوسین.. بە کوردی هزرین" بەڕێوەدەچێت و تێیدا ژنانی نوسەر و خوێنەر ئامادەییەکی بەرچاو و کاریگەریان هەیە.
ئەم کچە نوسەرە گەنجە کە بە دو کتێبی خۆی بە ناوەکانی "ئیلهامەکانم" و "درەوشانەوە لە تاسیادا" سەرنجی زۆری خوێنەرانی بۆ لای خۆی راکێشاوە، ساڵی رابردوش لە پێشانگای نێودەوڵەتی کتێب لە هەولێر بەشدار بوە. ئەو پێشوازیی گەنجان بۆ بەرهەمەکانی بە "زۆر زۆر باش" وەسف دەکات و دەڵێت: "ساڵی رابردو کتێبەکەم یەکێک بو لە پڕفرۆشترینەکان، بەجۆرێک دوو ڕۆژ بەر لە تەواوبوونی پێشانگاکە چاپی تەواو بو".
ئیلهام دڵشاد، ئاماژە بەوە دەکات، کە رێگای داهێنان بێبەربەست نییە، بەتایبەت کێشەی نەبونی سپۆنسەری ماددی و گرفت لەگەڵ چاپخانەکان وەک سەرەکیترین رێگر لەبەردەم نوسەران بە گشتی و کچانی نوسەر بە تایبەتی دەبینێت، بەڵام سەرباری ئەوە، ئامادەیی ژنان لەم پێشانگایەدا بە بەهێزی ماوەتەوە. ئیلهام دەڵێت: "ئامادەیی ژنانی نوسەر زۆر زۆرە، ئەوان بە کتێبی زۆر و بەرهەمی زۆر جوان بەشدارن، ههروهها ئامادەیی زۆری کچان و ژنان وەک خوێنەر، نمایشی ئەوە بو کە ژنانی ئێمە هۆشیارن، دەخوێننەوە و بەدوای بیروبۆچونی ئەوانی دیکەدا دەگەڕێن".
ئیلهام هیوایەکیش بۆ ساڵانی داهاتو دەخوازێت و دەڵێت: "هیوادارم ساڵی داهاتو کە پێشانگاکە کرایەوە، داوامان لێبکەن وەک ناوەندەکانی کتێب هەمومان بە جلی کوردییەوە بەشداری بکەین، بۆ ئەوەی رەسەنایەتی زمان و کلتورەکەمان پێکەوە لێرەدا رەنگبداتەوە".
سەبارەت بە پێشانگاکە
یەکەمین پێشانگای کتێبی کوردی، سەر لەبەیانی رۆژی پێنجشەممە رێکەوتی (٤ـی حوزەیران) بە بەشداریی زیاتر لە ۱۰۰ دەزگا و ناوەندی چاپ و بڵاوکردنەوەی کوردی لە هەرێمی کوردستان و دەرەوەی وڵات کرایەوە و بڕیارە تاوەکو کاتژمێر ٨ـی رۆژی ١١ـی حوزەیران بەردەوامی هەبێت.
بەپێی زانیارییەکانی پارێزگای هەولێر: ئامانجی سەرەکی ئەم پێشانگا ستراتیژییە گێڕانەوەی متمانەیە بۆ نوسەری کورد و ئاشتکردنەوەی خوێنەرە لەگەڵ قەڵەمی ناوخۆیی، کە تێیدا هەزاران ناونیشانی جۆراوجۆر لە بەرهەمە فکری، ئەدەبی، مێژویی، کۆمەڵایەتی و زانستییەکان دەخرێنە رو.
