* نەوژین
خانمە هونەرمەندی شانۆکار: گەزیزە عومەر، کتێبێک بڵاویدەکاتەوە کە گوڵبژێرێکە لە بەسەرهاتی جۆراوجۆری ژیانی خۆی.
کتێبەکە بە ناوی (کلوەبەفرەکان پەنجەکانم ناتەزێنن)ـە و بڕیارە لە هەفتەی داهاتوەوە دەست بە چاپکردنی بکرێت.
کتێبەکە بیرەوەرییەکانی گەزیزە عومەرە، گوڵبژێرێکە لە بەسەرهاتی جۆراوجۆر، کار لەسەر هەستە جیاوازەکانی خوێنەر دەکات و نۆستالژیا بەردەوامییەکی بەردەوامی لە ناوەڕۆکی کتێبەکە دا هەیە. هەروەک لە رێگەیەوە خوێنەر گەشتێک بە نێو چیرۆکەکانی ژیانی گەزیزە و خێزانەکەی لە سلێمانی و تەوێڵەدا دەکات و وەک هەمیشەش شانۆ چەقی باسەکان دەبێت.
بڕیارە لە ماوەیەکی نزیک دا ناوەندی چاپەمەنی و رۆشنبیری "کارۆ” کتێبەکە هاوشان لەگەڵ بەخشینی خەڵاتێک بەو خانمە شانۆکارە لە مەراسیمێکی تایبەتدا، بڵاوبکاتەوە.
گەزیزە عومەر عەلی، ساڵی ١٩٦١ لە شاری سلێمانی لەدایکبوە، بە یەکێک لە ئەستێرە درەوشاوەکانی بواری شانۆ و سینەما دادەنرێت، ئێستا ئەندامی رێکخراوی ژنانی شانۆنوسی جیھانییە.