* نەوژین
کچە دەرچویەکی پەیمانگا، کتێبێک دەربارەی زانستی ژنان و مناڵبون دەنوسێت و بڵاویدەکاتەوە، دەڵێت: ئامانجم یارمەتیدانی فێرخوازان و پڕکردنەوەی ئەو بۆشاییە زانستیەیە کە لەبوارەکەدا هەیە.
ئاڵتون عەبدوڵڵا، ٢٢ ساڵ، دانیشتوی ناحیەی قەسرێیە لە سنوری باڵەکایەتی سەر بە پارێزگای هەولێر و دەرچوی پەیمانگەی پزیشکی هەولێر بەشی ژنان و مناڵبونە.
ئەو کتێبێکی بەناوی "زانستی ژنان و مناڵبونی ئاڵتون" نوسیوە و بڵاویکردوەتەوە، کە تێیدا باس لە زانستی ئەبستێتریک (زانستی ژنان و مناڵبون) دەکات.
زانستی ئەبستێتریک، بریتیە لە باسکردن لە هەر نەخۆشیەک کە لە کۆمەڵگە دا بونی هەبێت، لەڕوی: نیشانەکانی، هۆکارەکانی، چارەسەرەکانی و کاریگەری لەسەر دایک و کۆرپەلە.
لەبارەی هۆکاری نوسینی کتێبەکەیەوە، ئاڵتون بە نەوژینی وت: ئەو کاتەی کە سەرەتا لە پەیمانگە وەرگیرام و دەمخوێند، بۆ دەستکەوتنی زانیاری زۆر دەگەڕام، بەڵام دەستم نەدەکەوت، بۆیە بڕیارم دا خۆم بەو کارە هەستم و ئەو بۆشاییە زانستیە پڕ بکەمەوە و کتێبێک لەبارەی زانستی ژنان و مناڵبون بە زمانی کوردی بنوسم.
زیاتر وتی: ئامانجمە ئەو فێرخوازانەی دەڕۆنە ئەو بەشە لێی سودمەند بن، هەروەک کتێبەکە تەنها تایبەت بە فێرخوازان نییە، بەڵکو هەموان دەتوانن سودی لێببینن و بە خوێندنەوەی شارەزایی لە بوارەکە پەیدا بکەن.
کتێبەکە لە (٣٥١) لاپەڕە و ٤٥ بابەتی جیاواز پێکدێت و لە ئێستا دا لە شارەکانی هەولێر و دهۆک بەردەستە و بەم نزیکانە لە سلێمانی و سۆرانیش بەردەست دەبێت.
ئاڵتون، پلانی نوسینی کتێبی پزیشکیی دیکەی هەیە.
وەکخۆی باسی لێوەکرد: گەر بزانم نوسینی ئەم کتێبە سودی دەبێت، ئەوا بەردەوام دەبم لەنوسینی کتێبی هاوشێوە، تاوەکو زۆرترین سود بە گەنجان و ئەوانەی لەبوارەکە کاردەکەن بگەیەنم.