* نەوژین
دەرهێنەرێکی کورد فیلمێکی دیکۆمێنتاری دەربارەی دو ژنە چالاکی بواری ژنان لە کوردستان، بەرهەمدەهێنێت.
دەرهێنەر: حسام یوسفی، رایگەیاند: فیلمێکی دیکۆمێنتاریم بەناوی (مەرگ چارەنوسی من نییە) بە شێوەی (سینەما واریتی) ئامادەیە، کە تێیدا باس لە دو ژنە چالاکی مافی ژنان لە کوردستان (بەهار مونزیر و لاوە محەمەد) دەکەم.
لەبارەی ناوەڕۆکی فیلمەکەشەوە دەڵێت: لە فیلمەکە دا ئەو دو خانمە چالاکە بەدواداچون بۆ دۆسیەی کوشتنی ژنێک دەکەن کە بە پاساوی "شەرەف" لەلایەن براکەیەوە کوژراوە و بنامەڵەکەشی هەوڵدەدەن تاوانەکە بشارنەوە تاوەکو کوڕەکەیان لە زیندان ئازادبکرێت.
فیلمەکە هاوکات بینەر دەباتە گۆڕستانی بێ ناونیشانەکان کە چەندین ژنی تێدا نێژراون کە بە پاساوی "شەرەف" لە لایەن پیاوانی خێزان و بنەماڵەکەیانەوە کوژراون، هەروەک بینەر دەباتە نێو ژیانی تایبەتی بەهار مونزیر و هەندێک لە گۆشەکانی ژیانی نمایش دەکات.
فیلمەکە لە ساڵی رابردوەوە لە هەرێمی کوردستان دەست بە کاری وێنەگرتنی کراوە و لە ئێستادا هەمو کارەکانی تەواو بوە.