ژنانى هەڵەبجە شەوانە بازاڕێک ده‌كه‌نه‌وه‌

2022/04/18    340 جار بینراوە
 
* نه‌وژین
 
له‌ پێناو به‌بازاڕكردنی كه‌لوپه‌ل و كاره‌ ده‌ستیه‌كانیان، ژماره‌یه‌ك لە ژنانی هه‌ڵه‌بجه‌ شه‌وانی رەمەزان‌ له‌ ناوبازاری شارەکەدا کارەکانیان نمایش ده‌كه‌ن.
 
سوزان شەعبان، سه‌رۆكی سه‌ندیكای رستن و چنینی هه‌ڵە‌بجه‌، به‌ نه‌وژینی وت: "پاش هەوڵ و ماندوبونێکی زۆر و بەیارمەتی سه‌رۆكی شاره‌وانی هه‌ڵه‌بجه‌، توانیمان شەوانە بازارێکی تایبەت بە نمایشی کاری دەستی بکەینەوە".
 
وتیشی: مه‌به‌ست له‌م كاره‌ په‌ره‌پێدانی كاركردنى ژنان و ده‌ستكه‌وتنی داهاتی تایبه‌ت به‌خۆیانه‌.
 
بازاڕەکە هەمو شەوانێکی رەمەزان لە کاتژمێر هەشتی شەو تاکو درەنگانێکی شەو کراوە دەبێت، تیایدا زیاتر لە 15 ژن نمایشی کارە دەستیەکانیان و خواردن و شیرینی جۆراوجۆر ده‌كه‌ن.
 
دەربارەی ئەگەری بەردەوامبونیان بۆ دوای رەمەزان، سۆزان شەعبان، وتی:"نازانین بەردەوام دەبێت یاخود نا، به‌پێی خواست و ویستی بازارە".
 
شەوانە بازاڕەکەى هه‌ڵه‌بجه‌ لە چەند خێوه‌تێك پێکدێت و شوێنی لە بەرامبەر شارەوانی هەڵەبجەدایە.
 

 

 



Newjin.net - 2022
ژمارەی سەردان 768,793     ژمارەی میوان 33

دروستکراوە لەلایەن کۆمپانیای (کۆدتێك)ەوە