کچان خۆیان فێری هونەرەکانی بەرگری دەکەن

2021/01/21    977 جار بینراوە
 
‎* ‎نه‌وژین، هاوژین مەهدی
 
 
لە هۆڵێكی وەرزشی کەلار، نزیکەی ٢٠ کچ خەریکی فێربونی هونەری بەرگری کردنن لە خۆیان کە پێی ‏دەوترێت (کاراتی)، په‌رۆشى ئه‌وان بۆ ئه‌م وه‌رزشه‌ گه‌شتوه‌ته‌ ئاستێك كه‌ پاره‌ى رۆژانه‌یان كه‌ ماڵه‌وه‌ ‏پێیان ده‌ده‌ن، كۆ ده‌كه‌نه‌وه‌ بۆ به‌شدارییكردن له‌ خوله‌كه‌‏‎.‎
 
یاری کاراتی واتا به‌رگرییكردن بە دەستی بەتاڵ، سەرەتای سەرهەڵهێنانی دەگەڕێتەوە بۆ دورگەی ‏ریوکیو لە وڵاتی ژاپۆن‎. ‎
 
دڵستان محەمەد، یەکێک لە بەشداربوەکانی خولی کاراتیە، پێیوایە زۆر گرنگە کچان لەمجۆرە وەرزشانە ‏ئەنجام بدەن، هۆکارەکەشی وابەستەکرد بەوەی ”زۆربەی کات کچان توشی قسەو هەڵسوکەوتی ناشرین ‏دەبنەوە لەلایه‌ن رەگەزی بەرامبەرەوە بۆیە باشترە فێر بین بەرگری لە خۆمان بکەین“. ‏
 
چیمەن محه‌مه‌د، هەمان رای هەیە، وتی: ”بۆ فێربونی بەرگریکردن لە خۆم هاتومەتە ئێرە‎“‎‏.‏
 
 
‏”خێزانەکەم زۆریان پێخۆشبو کە وتم دەمەوێت فێری کاراتی ببم“‏
 
 
وەک کچانی بەشداربوی ئەم راهێنانە ئاماژەی بۆ دەکەن رێگری خێزان و کۆمەڵگا بۆ وەرزشکردنی ‏کچان بەردەوامی هەیە، بەڵام ئەم تێڕوانیە لە ناو بەشێک لە خێزانەکان گۆڕاوە‎.‎
 
هێرۆ موراد، یەکێکە لە کچانی بەشداربو، باسی لە رای خێزانەکەی کرد بۆ بەشداریکردنەکەی و وتی: ‏ماڵەوە زۆریان پێخۆش بو کە وتم بەشداری خولێکی راهێنانی لەمشێویە دەکەم‎.‎
 
 
قەزای کەلار، کچان لە هۆڵێکی وەرزشی لەکاتی راهێنانی کاراتی، وێنە: نەوژین
 
ئەو کەسانەی کە دەتوانن بەشداری ئەم جۆرە خولانە بکەن، بە وتەی راهێنەری هۆڵی لەشجوانی مای ‏جیم له‌ كه‌لار، دەبێت تەمەنیان لە نێوان ٥ بۆ ٣٥ ساڵی بێت‎.‎
 
ئارەزو جەلیل، وتیشی: ”ئەو کەسەی دێت بۆ کاراتی و فێربونی، تاوەکو تەمەنی مناڵ تر بێ زیاتر و ‏زوتر فێرى جوڵەی یاریکردنەکە دەبێت‎“‎‏.‏
سودەکانی ئەم یاریەبە وتەی ئەم راهێنەرە بەدەر لە فێربونی تەکتیکی بەرگریکردن، کۆمەڵێک ‏گۆڕانکاری لەسەر کەسەکان جێدەهێڵێت، وەک: زیادکردنی متمانە بەخۆبون و زیادکردنی تەرکیز و ‏دورکەوتنەوە لە خەمۆکی و توڕەیی هەروەها بەهێز کردنی جەستە‎.‎
 
 
پاره‌ى رۆژانه‌یان كۆ ده‌كه‌نه‌وه‌ بۆ به‌شداریكردن له‌ خوله‌كه
 
 
هۆکاری لاوازی لایەنەی ئابوری، یەکێکە لەو هۆکارانەی کچان نەتوانن بەشداری را‌هێنانە وەرزشیەکان ‏بکەن، یاخود خێزانەکان ئامادە نین بۆ ئەمجۆرە حەزەی کچەکانیان وەک لایەنی مادی پشتگیریان ‏بکەن. ‏
 
هانا، ئەم گرفتەی روبەڕو بوەتەوە وتی: ”زۆ حەزم کرد بەشداری ئەم خولە بکەم، بەڵام باوکم وتی ‏خۆت بەشداری خول ئەکەی ئەبێ خۆتیش پارەکەی بدەی، بۆیە منیش ئەو پارەیەی کە رۆژانە باوکم ‏پێم دەدات، کۆی ئەکەمەوه‌ و مانگانە ئەیدەم بەم خولە‎“‎‏.‏
 
بەربەستەکانی بەردەم کچان بەردەوامە بەڵام چیمەن و دڵستانیش  بەردەوام لە مەشقەکانیان و ‏دەیانەوێت چی دیکە کە توانج یان گێچەڵیان پێگیرا وەڵامێکی دیکەیان هەبێت بۆ کەسەکان.
 

قەزای کەلار، کچان لە هۆڵێکی وەرزشی لەکاتی راهێنانی کاراتی، وێنە: نەوژین



Newjin.net - 2024
ژمارەی سەردان 1,305,168     ژمارەی میوان 67

دروستکراوە لەلایەن کۆمپانیای (کۆدتێك)ەوە