ئاران، بە یەکێک لە براوەکانی پێشبڕکێی رۆژنامەوانی مافەکانی مرۆڤ دیارییکرا

2022/12/10    544 جار بینراوە

 

 * نەوژین

خانمە رۆژنامەنوس: ئاران نەجات، توانی ببێتە براوەی دوەمی پێشبڕکێی رۆژنامەوانی مافەکانی مرۆڤ لە کوردستان بۆ باشترین راپۆرتی نوسراو و بینراو.

ئەمڕۆ شەممە (١٠ـی ١٢-٢٠٢٢) لە کەلار و له‌ رۆژی جیهانى مافه‌كانى مرۆڤ دا، رادیۆی دەنگ بەپاڵپشتی سندوقی نیشتمانى بۆ دیموكراسی (NED)، مه‌راسیمی وه‌رزی حه‌وته‌مى پێشبڕكێی رۆژنامه‌وانى مافه‌كانى مرۆڤی ئەنجامدا و سێ رۆژنامه‌نوس بون به‌ براوه‌ى پێشبڕكێكه‌.

هاوکات خانمە رۆژنامەنوس: ئاران نەجات، بە راپۆرتێکی ڤیدیۆی بەناونیشانی (خانەی نەوجەوانان; ڕوناکی خەمی بێسەرپەرشتیارانی شار) توانی ببێتە براوەی دوەمی پێشبرکێکە. ئەو لەبارەی بیرۆکەی راپۆرتەکەیەوە بۆ نەوژین وتی: من پێشتر لە نوسینگەی جێگری سەرۆکی حکومەت کارم دەکرد، رۆژێک گوێبیستی ئەم کێشەیە بوم، زۆر کاری لێکردم بۆیە راستەوخۆ بڕیارمدا بەدواداچونێکی ورد دەربارەی ئەم کەیسە بکەم، ئەوە بو لەکۆتایدا ئەنجاممدا و کردم بە راپۆرتێکی ڤیدۆیی.

ئاماژەی بەوەشکرد: بەڵام بەداخەوە دوای بڵاوبونەوەی راپۆرتەکە هیچ کەسێکی پەیوەندیدار بە کێشەکە نەهاتنە سەرخەت و هیچ کارێک نەکراوە بۆ چارەسەرکردنی ئەم کێشەیە.

ئاران، دەرچوی بەشی راگەیاندنی زانکۆی سلێمانیە، هاوکات چوار ساڵە بێ دابڕان کاری راگەیاندن دەکات، هەروەک لە چەندین دەزگا و دیجیتاڵ میدیا کاری کردوە وەک: خاک، ئێستا، ژیان، خەندان و دیپلۆماتیک، وەکخۆیشی باسی لێوەکرد: لە هەمو بوارەکاندا هەواڵ و راپۆرتی ئامادەکردوە.

ئەو بۆ نەوژین رونیکردەوە کەوا باوکی یارمەتیدەری سەرەکیەتی.

وتی: هەر لە سەرەتای دەستپێکردنمەوە باوکم پاڵپشتی سەرەکی و یارمەتیدەرم بوە، هەر ئەویش یارمەتی دام تاکو بەشداری ئەم پێشبرکێیە بکەم.

کلیک بکە بۆ بینینی راپۆرتەکەی ئاران.



Newjin.net - 2024
ژمارەی سەردان 1,472,412     ژمارەی میوان 562

دروستکراوە لەلایەن کۆمپانیای (کۆدتێك)ەوە