رێناس ساڵح، سەرنوسەری نەوژین لەکاتی وەرگرتنی خەڵاتی یەکەمی ژنە رۆژنامەنوسی ساڵ لەسەر ئاستی عێراق وێنە: رێکخراوی ئینتەرنیوز

 

نەوژین دەستپێشخەرییەکی میدیایی ئەلیکترۆنی تایبەت بە پرسی ژنە، گرنگیی دەدات بە: تیشکخستنەسەر پرسی ژن، تەنگژەکانی بەردەم ژنان، شۆڕبونەوە بە قوڵایی کێشەکانی ژنان و یەکسانی جێندەریی و وەستان لەسەر ھۆکار و لێکەوتەکانیان، بایەخدان بە بەرەوپێشەوەچونەکانی پرسی ژن و پاڵپشتیکردنی میدیایی دەستپێشخەرییەکانی ژنان.

 

ئەم سەکۆ ئەلیکترۆنیە کە ئێستا خۆی لە: وێبسایتێک و ژمارەیەک پەڕە لە تۆڕە کۆمەڵایەتییەکانی: فەیسبوک، ئینستاگرام و یوتیوب دەبینێتەوە، لە مانگی تشرینی دوەمی ٢٠٢٠ـەوە وەشانی خۆی دەستپێکرد. لەبنەڕەتیشەوە لە کانونی دوەمی ٢٠١٦ـەوە وەکو رۆژنامەیەکی تایبەتمەندی لۆکاڵی لە ناوچەی گەرمیان مانگانە چاپ و بڵاو دەکرایەوە، دوای نزیکەی چوار ساڵ و دەرکردنی ٤٥ ژمارە، وەشانی چاپیی رۆژنامەکە راوەستا و وەکو سەکۆیەکی ئیلیکترۆنی بەردەوام بو.

 

سەکۆکە لەلایەن رادیۆی دەنگ بە پاڵپشتی سندوقی نیشتمانی بۆ دیموکراسی (NED) دەستی بە وەشان کردوە، ستافی سەرەکی سەکۆکە ٣ ژنە رۆژنامەنوسن لە کەلار، لەگەڵ ژمارەیەک (نزیکەی ١٢) لە ژنانی رۆژنامەنوس و پەیامنێر لە شار و ناوچە جیاوازەکانی ھەرێمی کوردستان.

 

ئەگەرچی تەمەنی سەکۆکە کەمترە لە ساڵێک، بەڵام توانیویەتی زیاتر لە (٥٢٨ ) بابەتی رۆژنامەوانی جیاواز بەرھەمبھێنێت و بڵاوبکاتەوە، ئەم بابەتانەش لێکەوتەی باشیان ھەبوە، بەتایبەتی کە ھەندێک لەوانە لەلایەن دەیان دەزگای رۆژنامەوانی و ماڵپەڕ و سەکۆی تۆڕە کۆمەڵایەتییەکانەوە جارێکی تر بڵاوکراونەتەوە.

 

چەند دیمەنێک لە فستیڤاڵی ئەمساڵ دیاری کردنی باشترین میدیایی عێراقی و رۆژنامەنوسی ژن لە عێراق بۆ روماڵی پرسی ژنان.