یەکەم کچی خاوەن گەلەری لە کوردستان

2021/01/14    884 جار بینراوە
 
* نەوژین
 
بۆیەکەم جار لە شاری هەڵەبجە کچێک گەلەریەک دەکاتەوە و رۆژانە هاوڵاتیان سەردانی دەکەن، هاوکات دەبێتە یەکەم کچیش کە کارێکی لەو شێوەیە ‏لەسەر ئاستی کوردستان ئەنجامدەدات.
 
حوسنا هەورامی، ئەو کچەیە کە ماوەی دە ساڵە لە بواری هونەری شێوەکاری کاردەکات و ئێستاش بەرهەمەکانی لە گەلەریەکەدا بەناوی(هەتوان)،  رۆژانە ‏نمایشدەکات. (حوسنا)، ئەزمونی خۆی و کارەکەی بۆ نەوژین، بەم شێوەیە دەگێڕێتەوە.‏
 
 
(حوسنا هەوارامی)، گەلەری هەتوان، هەڵەبجە
 
ئەگەرچی من دەرچوی بەشی کارگێری کارم، بەڵام بەهۆی نەبونی دەرفەتی دامەزراندن لە ناوەندە حکومیەکان بیرمکردەوە پەرەبە بەهرە هونەریەکەم بدەم ‏و بیکەم بەپیشەم.‏
 
‏”ئەمەی ئێستا پێیگەیشتوم ئامانجی ژیانم بو“‏
 
یەکێک لە ئامانجەکانم لە ژیانمدا ئەوەبو بتوانم لە شوێنێک تابلۆکانم نمایشبکەم و خزمەتبێت بە هونەر و بەهرەکەم هەربۆیە بەدوای ئەو رێگایەدا ‏دەگەڕام کە دەیگەیاندم بە ئامانجەکەم بەشداری چەندین پێشەنگام کرد لەگەڵ ئەوەشدا کارو پرۆژەی هونەریم ئەنجامدەدا.‏
 
 
من بەردەوام بوم لە پەرەدان بەبەهرەکەم ئەوەبو رێکخراوێکی نێودەوڵەتی کۆمەڵێک پرۆژەی بچوکی گەنجانی هەڵەبجەیان وەردەگرت منیش بەدەرفەتم زانی ‏پرۆژەکەی خۆم پێشکەشکردن خۆشبەختانە وەرگیرا و رێکخراوەکە ئەرکی سپۆنسەریکردنیان گرتە ئەستۆ، ئەوەبو لە ٤ کانونی دوەمی ئەمساڵ ‏گەلەریەکەم کردەوە.‏
 
 
وێنە: گەلەری هەتوان، هەڵەبجە
 
لە ناوگەلەرەی هەتوان بەدەر لە تابلۆ و نیگارە رەنگاورەنگەکان سەدان چای، جۆراو جۆر پێشکەش بەسەردانی کەران دەکرێت کە خۆی دەبینێتەوە لە ‏چای گوڵەبەیبون، لیمۆ، زعفران، پرتەقاڵ، بەهێ،چای شلیک....هیتر.
 
 
وێنە: چای دەرمانی گەلەری هەتوان، هەڵەبجە
 
لە ئێستادا تەنها تابلۆکانی خۆم لەگەلەریەکدایە نمایش دەکەم بەڵام لە پلانمدایە لە داهاتودا تابلۆی شێوەکارانی دیکەش وەربگرم و نمایشی بکەم هیوادارم ‏ئەم شوێنه ببێته ماڵێکی ئارام بۆ رۆحی خەڵکی و شوێنی ساغکردنەوەو فروشتنی کاری بەهرەمەندان.‏
 

وێنە: گەلەری هەتوان، هەڵەبجە

 

 

 



ئەرشیفی نەوژین | دەربارە | پەیوەندی
Newjin.net - 2021
دروستکراوە لەلایەن کۆمپانیای (کۆدتێك)ەوە
ژمارەی سەردان 62,349     ژمارەی میوان 10