نەوژین - هۆزان فەریق
لە کارێکی نوێدا چەند خانمێک لە شارە جیاوازەکانی کوردستان هەستاون بە دیزاین کردون و رازاندنەوەی ماڵان بە چەندین شێوازی جیاواز و دەڵێن”زانست و هونەر پێکەوە بەکاردەهێنین بۆ کارەکانمان تاوەکو بینە خاوەن داهاتی خۆمان“.
لە گەڵ کرانەوەی ژنان بە دونیای کارو ئابوری سەربەخۆ لە چەندین بوار شوێن دەستی خۆیان نەخشاندوە.
شۆخ شێروان، تەمەن (٢٥ ساڵ) یەکێکە لەو خانمانەی کاری دیزاینی بیناو شوێنی کاردەکات، ئەو بەهەرە هونەریەکەی و توانا زانستیەکەی بەکارهێناوە بۆ کارەکەی، لە خوێندنی زانکۆ بەشی ئینترۆ دیزاینی تەواو كردوە كە بەشێكە سەر بەكۆلێژی بیناسازی'میعماری'ە.
شۆخ شێروان، وێنە: نەوژین
شۆخ، خۆی بە خۆشبەخت دەبینێت لەبەرئەوەی خۆی حەزێکی زۆری بۆ هونەری دیزیان هەبوەو توانیویشیەتی زانستەکەی بخوێنێت ئێستا پێکەوە بەکاریان دەهێنێت، ئەمەش بەوهۆیەوە بوە کە دایکی هاوکارێکی باشی بوە کە ئەم کچەی هەرلەمنداڵەوە فێری دۆزینەوەی بەهرەو خواستەکانی کردوە.
لەگەڵ ئەوەشدا دەیەوێت کۆمەڵگا تەنها بەچاوی جەستەوە سەیری ئافرەت نەکەن بەڵکو تواناکانیان ببینن بۆ ئەمەش پێی وایە ژنان دەبێت خۆیان ئەوە بسەلمێنن.
کارێکی شۆخ شێروان، وێنە: نەوژین
بۆ نەوژین وتی: ”چەند گرنگی بە كارەكەی خۆم ئەدەم ئەوەندەش گرنگە كە وەك ئافرەتێك كارەكتەرێك بم لە كۆمەڵگاكەی خۆمدا بەکارەکانم دەمەوێت بیسەلمێنم ژن ئەوەنیە تەنها لەڕوی جەستەو جوانییوە دەربكەون و بناسرێن بەڵكو ژن بە ئەقڵی خۆی بناسرێت“.
”کارکردن بۆ ژنان لە دەرەوە زەحمەتی زۆرە، بەڵام ئابوری قەرەبوی دەکاتەوە“
رێزان یەکێکە لەو خانمانەی ئەم کارە دەکات ئەو سەرەتا لەماڵەکەی خۆیەوە دەستی پێکردوە، دواتر لە رێگەی پەیجێکەوە دەستپێکردوە کە هەوڵی فێرکردنی کەسانی دیکەی داوە لە رێگەی ئەو کارانەی کە خۆی کوردونی.
ئەو خانمە بە گرنگی دەزانێت چی دیکە ژنان چاوەڕێی بەرهەمی دەستی حکومەت نەبن بەڵکو بەخۆیان بگەڕێن و هەوڵ کارێکی تایبەت بە خۆیان بگرنە دەست.
کارێکی رێزان لوقمان، وێنە: نەوژین
بەرای ئەو”هەمو کارێک سەرەتا سەخت و گرانە، بەتایبەت بۆ ژنان و تایبەتتریش بۆ ئەو ژنانەی کە هەم کاری دەرەوە و هەم کاری ماڵەوەش بکەن، بەڵام ئەوە بیانو نییە بۆئەوەی لەماڵەوە دانیشن و هیچ کارێک نەکەن ژنان دەبێت بەردەوام بن بۆ ئەوەی ئابوری سەربەخۆی خۆیان بەدەست بهێنن“.
رێزان لوقمان، تەمەن(٣١ ساڵ) دانیشتوی شاری سلێمانیە، ژیانی هاوسەرگیری پێکهێناوەو دایکی سێ منداڵە، وەک خۆی دەڵێت ”ئەگەرچی دەرچوی کۆلێژی پەروەردەی ئینگلیزیم و پیشەم مامۆستایە، بەڵام ماوەیەکی زۆرەخولیای دیزاینکردنی ناوماڵ و توحفیاتم هەیە“.
رێزان لقمان، وێنە: نەوژین
پەرەی بەکارەکەی داوەو رۆژانە خەڵکی پەیوەندی پێوەدەکەن بەمەبەستی دیزاینکردن ناو ماڵەکانیان، بۆزیاتر ناساندنی کارەکانیشی پەیجێکی تایبەتی داناوەو لەڕێگەیەوە پەیوەندی پێوەدەکرێت.
رێزان، دەڵێت: ئامانجی من ئەوەیە هەموکەس ماڵ وژیانی خۆی لاجوان بێت وهەوڵ بدات لاسایی کەسانی ترنەکاتەوە، زۆرگرنگە خانمان هەوڵ بدەن بۆن وبەرامەو سیمای ماڵەکەیان لەهیچ ماڵێکی ترنەچێت، جێ پەنجەی خۆیان هەبێ بەشتەکانی ماڵەکەیانەوە وبەسەلیقەیەو دەسترەنگینبن. لەگەڵ ئەمانەشدا پاڵپشتی هاسەرەکەی بە هۆکارێکی باشی سەرکەوتنی کارەکەی دەزانێت.
ئەگەر 'رێزان' هاوسەرەکەی پاڵپشتی بێت ئەوا 'شۆخ' لەگەڵ هاوسەرەکەیدا کارەکانی دەکات، ئەمەش هێندەی دیکە هاوکاریەتی بۆ ئەوەی کارەکانی بە باشی ئەنجام بدات خۆشی بە خاڵی سەرکەوتنی بزنسەکەیانی دەزانێت.
شۆخ شێروان، لەکاتی کاردا،وێنە: نەوژین