* نەوژین
هێزەکانی پۆلیسی پارێزگای هەولێر، هاوسەری ئەو ژنەیان دەستگیرکرد کە لە یەکێک لە شوقەکانی نیشتەجێبون کەوتە خوارەوە و بەهۆیەوە گیانی لەدەستدا؛ دەستگیرکردنی هاوسەرەکەی دوای ئەوە دێت کە دەرکەوتوە پێش روداوەکە کێشە و دەمەقاڵێ لە نێوانیاندا هەبوە.
بەپێی رونکردنەوەیەکی فەرمی بەڕێوەبەرایەتی پۆلیسی هەولێر، روداوەکە ئێوارەی ئەمڕۆ رویداوە، ژنەکە ناوی (س. ا. ع) و لەدایکبوی ساڵی ١٩٩٧ بوە و بە رەچەڵەک کوردی رۆژاوای کوردستانە.
پۆلیسی هەولێر سەبارەت بە دەستگیرکردنی هاوسەرەکەی دەڵێت: "دەستبەجێ هاوسەری ژنەکە لەلایەن هێزەکانمانەوە دەستگیرکرا و لە لێکۆڵینەوە سەرەتاییەکاندا ئاماژەی بەوە کردوە کە پێش روداوەکە دەمەقاڵێ لە نێوانیاندا دروستبوە".
پۆلیس دەشڵێت: لە ئێستادا تەرمی ژنەکە رەوانەی پەیمانگای پزیشکی دادی هەولێر کراوە و پەڕاوی لێکۆڵینەوە بۆ روداوەکە رێکخراوە بەمەبەستی تەواوکردنی رێکارە یاساییەکان و ئاشکراکردنی هۆکاری راستەقینەی گیانلەدەستدانی ئەو ژنە.
