* نەوژین
دوێنێ ٢٧ـی ئاب، پارلەمان عێراق دەنگی لەسەر 'بڕگەکانی شەریعەتی فیقهی جەعفەری' بۆ هەمواری یاسای باری کەسێتی دا، بە گوێرەی هەموارەکە، هاوسەرگیری کچان و کوڕانی خوار تەمەن ١٨ ساڵ، یاساییە.
یاساکە لە کۆمەڵێک ماددە و بڕگەی جیاواز پێکدێت، خاڵە سەرەکییەکانی پەیوەندیدار بە ژنان لە هەموارەکەدا:
بەپێی ئەم هەموارە نوێیە، هاوسەرگیری بۆ کچان و کوڕانی خوار تەمەنی ١٨ ساڵ بە یاسایی دەکرێت، ژن بۆی نییە لە گرێبەستی هاوسەرگیرییەکەی دا مەرجی ئەوە دابنێت کە مێردەکەی هاوسەرگیری دوەم نەکات
ئەگەر ژنێک پێشتر شوی کردبێت و جیابوبێتەوە و لە تەمەنی پێگەیشتوییدا بێت، باوک و باپیری دەسەڵاتی بڕیاردانیان بەسەریدا نییە بۆ هاوسەرگیری، بەڵام ئەگەر یەکەم جار بێت شو بکات یان پێشتر لە قۆناغی دەستگیرانی جیابوبێتەوە، بڕیاردان لەسەر شوکردنی هاوبەش دەبێت لەنێوان خۆی و باوک یان باپیرى بێت و لە کاتی ناکۆکی دا بژاردەی باپیر پەسند دەکرێت.
ئەگەر مێرد مافی ژنەکەی نەدا، ژن دەتوانێت کێشەکەی بباتە بەردەم دادوەر، بەڵام ئەگەر ژن ماڵی خۆی بەبێ مۆڵەت جێهێشت، مافی نەفەقەی نامێنێت، سەبارەت بە مەرجەکانی نیشتەجێبون، ئەگەر ژن مەرجی ئەوە دابنێت کە لە وڵاتەکەیان یان لە ماڵێکی سەربەخۆ بژی، مێردەکەی دەبێت پابەند بێت، بەڵام پابەند نەبون بەو مەرجە مافی هەڵوەشاندنەوەی گرێبەستی هاوسەرگیرییەکە نادات.
یاسا نوێیەکە رێگە بە کچێکی موسڵمان نادات هاوسەرگیری لەگەڵ کەسێکی ناموسڵمان بکات.
هەروەها تۆمارگەی حوکمە شەرعییەکان جەخت دەکاتەوە کە دەبێت هەردو هاوسەر بە زارەکی و بە رەزامەندیی خۆیان هاوسەرگیری ئەنجام بدەن، بەبێ ئەوەی زۆر و گوشار لەسەریان بێت، پێگەیشتویی یەکێکە لە مەرجە سەرەکییەکانی هاوسەرگیری.
ئەم گۆڕانکارییانە، کە لە تۆمارگەی حوکمە شەرعییەکانی مەزهەبی جەعفەری هاتون، لەمەودوا لە دادگاکاندا جێبەجێدەکرێن بۆ ئەو هاوسەرانەی کە شوێنکەوتوی مەزهەبی شیعەن.
