* نەوژین
لە ئاکرێ برایەک خوشکەکەی بە دەستڕێژی گوللە کوشت و زاواکەشی بریندارکرد، دوای روداوەکەش تۆمەتبارەکە دەستگیرنەکراوە.
ئەمشەو (٣٠ـی ئەیلولی ٢٠٢٤) لە گەڕەکی قاچاخاڤا لە قەزای ئاکرێ، کەسێک تەقەی لە خوشکەکەی و زاواکەی کرد و بەهۆیەوە خوشکەکەی گیانی لەدەست دا و مێردی خوشکەکەیشی بریندارە و رەوانەی نەخۆشخانەی دهۆک کراوە.
بەپێی زانیارییە میدیاییەکان، ژنەکە کە تەمەنی ٤٠ ساڵ بوە، لە ئاکامی دەستڕێژی گوللەی براکەی گیانی لەدەستداوە و لەمیانی دەستڕێژەکەدا ١١ گوللەی بەرکەوتوە.
هەر بەپێی زانیارییەکان، تۆمەتبار لەدوای روداوەکە، هەڵهاتوە و دەستگیرنەکراوە، پۆلیسیش هیچ زانیاریەکی لەبارەی چۆنیەتی و هۆکاری روداوەکە بڵاونەکردوەتەوە.
ئەمە لەکاتێکدایە دو رۆژ بەر لە ئێستا و رۆژی (٢٨ـی ئەم مانگە) هەر لە سنوری پارێزگای دهۆک و لە گوندێکی سەر بە قەزای ئامێدی، پیاوێک بە دەستڕێژی گوللە ژنەکەی کوشت و سێ لە مناڵەکانیشی بریندار کرد.
