* نەوژین
رێکخراوی یەکێتی ژنانی کوردستان رایدەگەینێت: ژنان بونەتە کاڵاو بۆ دومەبەست بەکاردەهێندرێن یان دەیانکەنە بوكەڵەی دروستكراو ومۆدیل و نمایشیان پێدەکەن یان بەناوی ئاینی پیرۆزی ئیسلامەوە دەیانخەنە ناو ئەجێندای هەندێ پارت و بەكاریان دەهێنن بۆ مەبەستی تایبەتی خویان.
لە راگەیاندراوەکەی یەکێتی ژناندا هاتوە: لەگەڵ ئەوەی ئێمە لایەنگرێكی ئازادین بەتایبەتی پۆشینی جلوبەرگ كە لەمافە سەرەتاییەكانی مرۆڤە، بەڵام بەداخین ئەمڕۆ لەم هەرێمەدا دیاردەیەكی بێزراوی دور لەگشت بەهایەكی مرۆڤایەتی هاتوەتە كایەوە، بەزەوتكردنی جەستەی ژنان.
ئاماژەیان بەوەکردوە: لەلایەك ژنان دەكەنە بوكەڵەی دروستكراو ومۆدیل و نمایش پێكردنیان وەك كاڵایەكی بازرگانی لەتۆرە كۆمەڵایەتییەكان و هەندی كەناڵی راگەیاندنی نا بەرپڕس، لەلایەكی دیکەشەوە بەناوی ئاینی پیرۆزی ئیسلامەوە دەیانخەنە ناو ئەجێندای هەندێ پارت و گروپی سەر بەوڵاتانی دەرەوەی ناوچەكە و بەكارهێنانیان بۆ مەبەستی تایبەتی خویان و بێبەش کردنیان لەسادەترین ماف و وەك سوپایەك نمایشیان پێدەكەن بۆ پیشاندانی هێزو دەستكەوتی سیاسی خۆیان لەژێر ناوی پیرۆزی ئیسلامدا.
هاوکات داوا لە ژنان دەکەن بە یەک هەڵوێست فشار لەسەر دەسەڵات دروست بکەن و دەڵێن: بەتوندی هەردو دیاردەكە رەت دەكەینەوەو داوا لەژنان دەكەین كە بەیەك هەڵوێست بێنە دەنگ و ببنە فشاری راستەقینە لەسەر دەسەڵات و سەرجەم سەركردایەتی سیاسی هەرێمی كوردستان كە چیتر مافی ژن نەكەنە قوربانی هیچ پرسێكی سیاسی.