* نەوژین
سیاسەتوان و نوسەری ئیسلامی کورد: ئەبوبەکر کاروانی، پەیوەندیدار بە پرسی حیجابی زۆرەملێ کە ئێران پەیڕەوی دەکات و بوە هۆی گیان لەدەستدانی ژینا ئەمینی تەمەن ٢٢ ساڵ، دەڵێت: حیجابی زۆرەملێ نابێتە ھۆی پاراستنی ئەخلاقی کۆمەڵایەتی، بەڵکو زیاتر لاوازی دەکات.
ئەبوبەکر کاروانی، لە پەرەی تایبەتی خۆی لە تۆڕی کۆمەڵایەتی فەیسبوک، لەوبارەوە نوسینێکی بڵاوکردوتەوە و لەبەشێکی دا دەڵێت: لە دیدی ئیسلامییەوە، باڵاپۆشی پەیوەندی بە ئیمان و قەناعەتی ژنی باوەڕدارەوە ھەیە، رێگەکەشی رۆشنبیرکردن و بانگەشە بۆکردن و ھاندان و پەروەردەکردنە، نەك توندوتیژی و سەپاندن.
پێیشیوایە "حیجابی زۆرەملێ لە رێی بەکارھێنانی زەبر و زۆری دەوڵەت بۆ سەپاندنی، جگە لە بیدعەیەکی ئەم سەردەمەی بێ پێشینە لە مێژوی ئیسلامیدا، ھیچی تر نیە".
ئەبوبەکر کاروانی، نوسیویەتیشی: ئەگەر بیانوی حیجابی زۆرەملێ پاراستنی ئەخلاقی کۆمەڵگە بێت، ئەوا نەك ھەر نابێتە ھۆی پاراستنی ئەخلاقی کۆمەڵایەتی، بەڵکو زیاتر لاوازی دەکات و کۆمەڵگە بەرەو ھەڵوەشانەوەی زۆرتر دەبات.