* نەوژین
ماوەی دو ساڵە هیچ حاڵەتێکی کوشتنی ژن بە بیانوی شەرەف لە قەزای سۆران تۆمارنەکراوە، وتەبێژی بەرەنگاربونەوەی توندوتیژی قەزاکەش دەڵێت: "لەگەڵ ئەوەشدا خۆسوتاندنی ژنان لە ئاستێکی بەرزدایە".
بە پێی ئامارەکانی ماڵپەڕی بەڕێوبەرایەتی گشتی بەرەنگاربونەوەی توندوتیژی دژ بە خێزان و ئافرەتان، ماوەی ٢ ساڵە هیچ ژنێک لە قەزاکە لە ژێر ناوی شەرف نەکوژراوە هەروەک لەماوەی دە مانگی ئەمساڵدا (١) حاڵەتی خۆ کوشتن، (٧) حاڵەتی خۆسوتان، (٧ ) دەستدرێژی سێکسی لەگەڵ (٢٧٢) سکاڵا تۆمارکراوە.
موقەدەم شێروان خالد، وتەبێژی بەڕێوبەرایەتی بەرەنگار بونەوەی توندوتیژی قەزای سۆران بۆ نەوژین، وتی: "زیاتر کچان ڕوبەڕوی حاڵەتی توندو تیژی ئەبنەوە لە ڕێگەی سۆشیال میدیاوە هەڕەشەی کوشتن یاخود بڵاو کردنەوەی وێنەیان لێ دەکرێت".
هەروەک ئاماژەی بەوەکرد دۆخی ژنان و توندوتیژییەکان بە بەراورد بە شارەکانی تر لە ئاستێکی باشدایە، ئەو دەڵێت: " رێژەی سوتان و خۆسوتانی ژنان رو لە بەرزبونەوەیە، لەگەڵ ئەوەشدا لەچاو ساڵانی رابردو بەهۆی هۆشیاری تاک و خێزانەوە زۆربەی ئەو هاوسەرانەی لەماڵەوە روبەڕوی توندوتیژی ئەبنەوە پەیوەندی بە هێڵی گەرم و پەیجی فەرمیەوە دەکەن یاخود سەردانی بەڕێوبەرایەتیمان دەکەن بۆچارەسەی کێشە کانیان".