کاتێک وەک ژنێک ئازادم ‏

2021/03/29    62 جار بینراوە
 
* لۆنا دڵشاد - نوسەرو وەرگێڕ
 
منی ژن مافێکی راستەقینەم دەوێت نەوەک روکەش چونکە کە من لێرە وەک ژنێک ئازاد بوم بچمە دەرەوە، بەڵام لە گێچەڵی سێکسی و دەستدرێژیی ‏پارێزراو نەبوم، کەواتە ئازاد نییم.‏
 
مافی کارکردن و خوێندنم هەبو، بەڵام بەهۆی رەگەزەکەمەوە، ئیمتیازێکی کەمتر یان زیاترم لە رەگەزی بەرامبەر پێ درا، کەواتە من مافی خۆمم وەر ‏نەگرتوە‎.‎
 
کە من بۆم هەبو لە کایە سیاسییەکاندا بەشدار بم بەڵام هیچ بۆ ئەو بوارە ئامادە نەکرام و تەنیا "کۆتا"یەکم پێ پڕ کرایەوە، کەواتە من بەڕاستی بەشدار ‏نییم‎.‎
 
”من نیوە ماف کراوم“
 
کە مافی ئەوەم هەبو خۆم هاوژینی ژیانم هەڵبژێرم، بەڵام کە مامەڵەی لەگەڵمدا نادروست بو و ویستم جیا ببمەوە، لە دادگا هەر بەو یاسا کۆنانە ‏مامەڵەم لەگەڵدا کرا و تاکە رێگەم بۆ دەربازبون لەو پیاوە یان پرۆسەیەکی تاقەتپڕوکێنی چوارپێنج ساڵە یان دەستبەرداربونم لە تەواوی مافەکانی خۆم و ‏منداڵەکانم بو، کەواتە نیو مافم هەیە‎.‎
 
کە لە بژاردەکانمدا بەرامبەر جەستەی خۆم ئازاد بوم، بەڵام بەرامبەر ئەو مافانە هۆشیار نەکرامەوە و ئاسانکاریی کرا کە ببمە نێچیری ئەو مافیا و ‏لایەنانەی دەمکەن بە کاڵا، کەواتە تەنیا بە روکەش ئازادم‎.‎
 
کە هاتیت کوێرانە هەندێک چەمکی شێواو و هاوردەکراوی وڵاتانی خۆرئاوات بەزۆر بەبەری من دادوری، بەڵام هیچ رێخۆشکەرییت نەکرد تا هۆشیار بمەوە و ‏لە جیهان تێبگەم و ئەرکەکانم وەک مرۆڤ و هاوڵاتییەکی ئەم جیهانە بزانم، کەواتە من تەنیا بۆ مەرامێکی شاردراوەی خۆت و لە زیندانێکی بچوکەوە ‏هاتومەتە زیندانێکی گەورەترەوە‎!‎
 


ئەرشیفی نەوژین | دەربارە | پەیوەندی
Newjin.net - 2021
دروستکراوە لەلایەن کۆمپانیای (کۆدتێك)ەوە
ژمارەی سەردان 89,834     ژمارەی میوان 13