کچە پێشمەرگەیەک بڕوانامەی شاهانە وەردەگرێت و سوپای بریتانیا بە شانازیەوە باسیدەکات

2021/03/26    1472 جار بینراوە
 
نەوژین - رێناس ساڵەح
 
 
‏”شەرەفمەندم کە توانیم ئەم بڕوانامەیە بە دەست بهێنم“ ئەمە قسەکانی میدیا ‏مەستییە لە مەراسیمی وەرگرتنی بڕوانامەی ئەکادیمیای  سان هیرستی شانەی ‏وڵاتی بریتانیا، کە تایبەتە بە پێگەیاندنی کادری پێشکەوتوی رێبەریکردنی ‏سەربازیی، چەندین شازادەو پاشا لە جیهاندا دەرچوی ئەم ئەکادیمیایەن. ‏‏'میدیا'وەک یەکەم ژنی کورد ئەو بڕوانامەییەی بەدەست بهێنا.‏
 
 
پێگەی سوپای بریتانیا‎ ‎‏'‏British Army‏'‏‎ ‎بە تایبەت باسی دەرچونی 'میدیا ‏مەستی' کردوە وەک رەچەشکێنیەک بۆ ژنانی کوردستان.‏
 
رۆژی ٢٠ ئەم مانگە لە خولی رێکخستنی ژمارە ٢١١ ی کە ١٩ کادیری دەرچوی ‏ئەکادیمیای 'سان ھیرستی' شاھانەی بەریتانیا لە مەراسیمێکی تایبەتدا بڕوانامەیان ‏پێبەخشرا وەک ئەفسەر، سێ لەو ژنانەی بەشداربون یەکەم جارە لە وڵاتەکانیان ‏ئەو بڕوانامەیە بەدەست بهێنن.‏
 
میدیا مەستی، تەمەن (٣٠) ساڵ، لە شاری سلێمانی دەژێت و پێشتر وەک پزیشک لە نەخۆشخانەیەکی تایبەتی ‏هێزەکانی پێشمەرگە کاریکردوە، دواتر هەڵبژێردراوە بۆ بەشداریکردن لەم ‏ئەکادیمیایە‎.‎
 
 
میدیا مەستی، لەکاتی مەشقەکانیدا لە ئەکادیمیای 'سان ھیرستی' شاھانەی بەریتانیا وێنە: ئەکادیمیای سان هیرسی.
 
میدیا لەکاتی وەرگرتنی بڕوانامەکەیدا چی وت؟
 
لەکاتی وەرگرتنی بڕوانامەکەیدا 'میدیا مەستی' وتارەکێکی پێشکەشکردو وتی: ”دو ‏هەفتەی یەکەم زۆر قورس بو بۆمن بەتایبەتی خەوتن لە کەش وهەوایەکی زۆر ‏ساردا، لەگەڵ ئەوەشدا هەرگیز بیرم لەوە نەدەکردەوە بتوانم کۆرسێکی وەک ئەمە ‏تەواو بکەم، من زۆر شانازی دەکەم کە راستگۆ بم لێرە کەسانی سەرسوڕهێنەرم ‏بینیوە و شەرەفمەندم کە لەم ئەکادیمیایە بڕوانامەم پێبەخشرا“.‏
 
 
ئەو کەسانەی بەشداری کۆرسی کۆمسیۆنکردن '‏‎ CCS‏'ئەم ئەکادیمیایە دەکەن،‎ ‎خشتەیەکی راهێنانیان بە شێوەیەکی تایبەت بۆ دروستکراوە مەرجەکانی بەشداران ئەفسەرانی لێهاتوی پرۆفیشناڵ وەک ددانناسان، ‏پارێزەران، پزیشکانی ڤێتێرنەری و ئەندامانی ئاینی و هەندێک بواری دیکەیە.
 
ئەکادیمیای سان هیرستی شانەی وڵاتی بریتانیا، بەھێزترین ئەکادیمیا سەربازیە لە ‏ئاستی جیھان بۆ خوێندکارە بییانیەکان تەنھا خوێندکار لەو وڵاتانە وەر ئەگیرێت ‏کە پێشتر کۆڵۆنی بەریتانیا بون، چەندین شازادەو پاشا لە جیھاندا دەرچوی ‏ئەم ئەکادیمیایەن  بەنمونە پاشای ئوردن، پاشای ئەلبانیا، شای بەحێرێن، شای ‏ئیسپانیا.... چەندینی تر.‏
 
‏‎‏
هاوکات کۆنسوڵگەری گشتی بریتانیا لە هەولێر، وەرگرتنی بڕانامەیەکی لەوشێوەیە ‏لەلایەن خانمێکی کوردەوە بەرزدەنرخێنێت و رایگەیاند: ”شانازی دەکەین بە ‏پاڵپشتیکردنی ئەفسەرەکانی ھێزی پێشمەرگە، بەتایبەت بونی دەرفەتی یەکسان بۆ ‏خانمان لە نێو ھێزەکانی پێشمەرگە“.‏
 
 
(چوکی وانگمۆ خەڵکی ‏بۆتان، میدیا ماستی لە هێزی پێشمەرگەی کوردستان و فیروشانا تاوفیق لە ‏مالدیڤەوە) وێنە:پێگەی  سوپای بریتانیا
 
لەم خولەی ئەکادیمیای سان هیرستی سێ ژن یەکەمجاریان بون لە وڵاتەکانیان ‏رێچکەشکێنی بکەن و ببنە خاوەن بڕوانامەیەکی بەهێزی لەم شێوەیە کە پێگەی ‏سوپای بریتانیا بەگرنگی زۆرەوە باسی لێوەکردون ئەوانیش (چوکی وانگمۆ خەڵکی ‏بۆتان ، میدیا ماستی لە هێزی پێشمەرگەی کوردستان و فیروشانا تاوفیق لە ‏مالدیڤەوە) هەروەک سوپای بریتانیا ئومێدی بۆ خواستون کە ببنە نمونەی ‏ئەفەسەری بەتوانا لە نیشتیمانەکانیان.‏
 
 
وەزیری پێشمەرگە: پلانمان هەیە ژمارەی ژنان لە هێزی پێشمەرگە زیاد بکەین
 
بەشداری ژنان لە ریزەکانی پێشمەرگەو هێزە ئەمنیەکان لە کوردستان لە ئاستێکی ‏نزمدایە بەشێوەک لە رۆژی ٨ مارس وەزیری پێشمەرگە رایگەیاند پرۆژەیەکیان بۆ ‏ئەو مەبەستە خستۆتە بواری جێبەجێکردنەوە.‏
 
شۆڕش ئیسماعیل، وەزیری پێشمەرگە وتی: ”بەر لەیەک ساڵ، وەزارەتی ‏پێشمەرگە، بەخۆشحاڵیەوە پڕۆژەی جێنده‌ر"یەکسانی کۆمەڵایەتی" راگەیاند بۆ ‏یەکسانی کۆمەڵایەتی و دادپەروەری لەنێوان ژن و پیاو و زیادکردنی رێژەی ژن ‏لەداهاتودا. ئێستا ئەو پڕۆژەیە جێی خۆی گرتوەو دەرئەنجامی باشیشی هەبوە“‎.‎
 
 
شۆرش ئیسماعیل، وەزیری پێشمەرگە لەگەڵ خانمێکی پێشمەرگە: وێنە: پێگەی وەزارەتی پێشمەرگە
 
بەمەش میدیا وەک یەکەم خانمی کورد توانی ئەم بڕوانامە گرنگە بە دەستبهێنێت کە لە ئاستی جیهاندا گرنگی زۆری هەیە  لەبواری ‏سەربازی، وەک خۆی دەڵێت”ئومێدەکەم بتوانم ببمە نمونەیەکی بەهێز بۆ ژنانی ‏کوردستان“.‏
 


Newjin.net - 2024
ژمارەی سەردان 1,306,047     ژمارەی میوان 712

دروستکراوە لەلایەن کۆمپانیای (کۆدتێك)ەوە